Það hefur verið líf og fjör á afrekssviði FVA í haust og mikið um að vera. Metfjöldi leggur stund á nám á sviðinu um þessar mundir, eða 63 nemendur. Íþróttagreinarnar eru líka fjölbreyttari sem aldrei fyrr, en á afrekssviði er nú verið að æfa fótbolta, körfubolta, fimleika, sund, golf, keilu og badminton.
Fréttaritari FVA heyrði í Helenu Ólafsdóttur, sviðsstjóra Afrekssviðs, og forvitnaðist um málið: „Það er virkilega ánægjulegt hve fjölbreytnin er mikil í þeim íþróttagreinum sem verið er að æfa núna. Ég held að það séu ekki mörg svið sem geta boðið upp á svona marga valkosti. Þetta er auðvitað ekki hægt nema með velvild þeirra sem standa að sviðinu og þeirra frábæru þjálfara sem við erum með. Aðstæður á Akranesi eru líka mjög góðar og nálægðin gefur okkur meiri möguleika en t.d. öðrum skólum.“
Þeir nemendur sem eru á afrekssviði æfa sína grein tvisvar í viku á skólatíma. Að auki fá þau einn tíma í styrktarþjálfun og einn bóklegan tíma í viku. Meðfylgjandi myndir voru svo teknar nýverið þegar hópurinn fékk fatnað frá Nike afhentan.
![](https://fva.is/wp-content/uploads/2021/12/20211209112317_IMG_1506-1-1024x683.jpg)
![](https://fva.is/wp-content/uploads/2021/12/20211209112323_IMG_1507-1024x683.jpg)
„Þessi mikli fjöldi nemenda hefur staðið sig virkilega vel og sýnt mikinn áhuga. Þau hafa stundað sínar æfingar vel og eru með sín markmið á hreinu“, segir Helena og bætir við: „ég vil nota tækifærið og þakka öllum nemendum, þjálfurum og mínum yfirmönnum fyrir samstarfið á önninni og vona að allir njóti hátíðanna.“
Nánari upplýsingar um afreksíþróttasvið FVA er að finna hér.