SKÓLANÁMSKRÁ

Fjölbrautaskóli Vesturlands á Akranesi (FVA) er bók- og verknámsskóli sem þjónar nemendum úr nágrannasveitarfélögum á Vesturlandi. Við skólann er starfrækt heimavist með plássi fyrir 60 nemendur og mötuneyti fyrir nemendur og starfsfólk. Gildi skólans eru jafnrétti, virðing og fjölbreytileiki og áhersla er lögð á lýðræðislega stjórnunar- og kennsluhætti.

Skólanámskrá FVA byggir á aðalnámskrá frá 2011 með breytingum frá 2015 og lögum nr. 92 frá 2008. Skólanámskrá er endurskoðuð reglulega með það að markmiði að tryggja ávallt gæði menntunar, náms og kennslu. Í skólanámskrá er m.a. fjallað um skólastarfið, réttindi, ábyrgð og skyldur, samskipti og reglur til upplýsingar fyrir alla hagaðila. Einnig er fjallað um áherslur í starfi skólans, s.s. stjórnun, nefndir og ráð, samstarf við innlenda og erlenda aðila og félagsstarf nemenda. Inntökuskilyrði, námsbrautalýsingar og áfangalýsingar í boði hverju sinni eru hluti af skólanámskrá en eru birtar á vef skólans, www.fva.is.

Skólinn starfar samkvæmt áfangakerfi. Skólaárið samanstendur af tveimur jafngildum önnum sem lýkur með margs konar námsmati. Almennt er miðað við að nemendur ljúki stúdentsprófi á þremur árum. Í bóknámi er hægt að stunda nám á framhaldsskólabraut og þremur stúdentsbrautum með mismunandi sérsviði. Einnig er í boði starfsbraut fyrir nemendur þroskahömlun og skyldar raskanir. Í verknámi er hægt að leggja stund á vélvirkjun, húsasmíði og rafvirkjun í dagskóla og í dreifnámi húsasmíði og nám á sjúkraliðabraut. Þá er í boði frá janúar 2024 að stunda nám í meistaraskóla í dreifnámi. Allar verknámsbrautir eru 5-6 annir auk starfsþjálfunar á vinnustað með ferilbók í INNU. Nemendur hafa aðgang að námsáætlun, stundatöflu og bókalista í INNU. Kennslustundir eru 55 eða 105 mínútur (tvöfaldur tími). Leitast er við að hafa kennsluhætti og námsmat fjölbreytt í anda gilda skólans. Um miðja önn fer fram leiðbeinandi miðannarmat og í lok annar eru verkefna- og námsmatsdagar þar sem lögð eru fyrir verkefni og próf.

Sérstaða FVA meðal framhaldsskóla hér á landi felst m.a. í breiðu námsframboði, sterkum tengslum við samfélag, skóla og atvinnulíf, bæði á svæðinu, á landsvísu og utanlands, notalegu andrúmslofti og persónulegri þjónustu við nemendur, auk stuðnings við afreksíþróttir í samstarfi við Akraneskaupstað og íþróttafélögin á svæðinu.

Skólanámskrá þessi tekur þegar gildi.

Akranesi, 21. júní 2024.

Steinunn Inga Óttarsdóttir, skólameistari

Hægt er að hlaða niður skólanámskránni á pdf-formi hér að neðan.