Námsframvinda

Almennt er miðað við að nemendur í bóklegu námi ljúki 25-35 einingum á önn auk íþrótta. Á iðnbrautum er einingafjöldi í sumum tilvikum meiri. Miðað er við að nám til stúdentsprófs taki að hámarki 9 annir og iðnnám taki ekki lengri tíma en sem nemur þremur önnum umfram annafjölda skv. áætlun námsbrautar. Á iðnbrautum gilda einnig þau viðmið að nemandi verður að ljúka öllum áföngum grunndeildar áður en áður en haldið er áfram námi á viðkomandi braut.

Hver nemandi þarf að skipuleggja nám sitt eftir brautalýsingu og stunda skóla samkvæmt stundaskrá. Ákvæði sem hér fara á eftir telja upp nánari reglur og ýmis möguleg frávik.

Helstu námskröfur

1. Miðað er við að nemandi ljúki a.m.k. 20 einingum á önn. Standist nemandi ekki þessi framvinduviðmið getur viðkomandi ekki gert ráð fyrir að fá fleiri en 20 einingar í stundatöflu næstu önn á eftir. Hafi nemandi ekki lokið a.m.k. 80 einingum eftir 4 annir í námi á hann ekki rétt á áframhaldandi skólavist næstu önn á eftir.
2. Nemanda er heimilt að sitja þrívegis í sama áfanga. Falli nemandi í sama skylduáfanga í þriðja sinn eða hafi hætt í áfanga eftir að 3 vikur eru liðnar af önn, að undangengnu samráði við náms- og starfsráðgjafa, þarf viðkomandi að sækja um setu í áfanga í fjórða sinn. Við fall í fjórða sinn er framhald ákveðið í samráði við áfangastjóra og náms- og starfsráðgjafa.
3. Um námsframvindu á iðnbrautum gildar sérreglur þar sem fall í einstökum áföngum býr til rof í samfellu námsins. Hvert tilvik um endurtekt áfanga í iðnnámi er því metið af áfangastjóra og deildarstjóra m.t.t hópastærða og öryggissjónarmiða. Almennt er miðað við að nemendur í iðnnámi ljúki námi í skóla áður en starfsþjálfun hefst. Þó getur komið upp sú staða, t.d. vegna smæðar nemendahóps að nauðsynlegt verði að gera tímabundið hlé á námi í skóla.
4. Ef fall á lokaprófi í einum áfanga kemur í veg fyrir að nemandi geti útskrifast á viðkomandi rétt á að endurtaka lokapróf í þeim áfanga í lok sömu annar. Það sama á við falli útskriftarnemandi í einum símatsáfanga. Slíkt endurtektarpróf gildir 100% til lokaeinkunnar. Greiða þarf fyrir endurtektarpróf skv. gjaldskrá skólans.
5. Til að standast áfanga þarf lágmarkseinkunn 5. Þó er nemanda heimilt að útskrifast með einkunnina 4 í tveimur áföngum ef um lokaáfanga eða staka áfanga er að ræða. Þeir áfangar gefa ekki einingar.
6. Nemendur í dreifnámi geta sótt um að endurtaka lokapróf í sérgreinum brautar. Sótt er um slíkt próf til áfangastjóra ekki síðar en 5 dögum eftir prófsýningardag. Slík próf fara fram í fyrstu kennsluviku vorannar í áföngum á haustönn og í lok vorannar í áföngum á vorönn. Greiða þarf fyrir endurtektarpróf skv. gjaldskrá skólans. Endurtektarpróf fara fram í FVA.

7. Skólameistara er heimilt að fela náms- og starfsráðgjafa eða áfangastjóra að gera samkomulag við umsækjanda/nemanda í skólanum um skólavist með skilyrðum. Skólavist með skilyrðum getur átt við um nemendur sem ekki standast lágmarkskröfur um skólasókn eða námsframvindu.

Dreifnám

Um kennslu í dreifnámi við gilda eftirfarandi viðmið:

Þjónusta skólans við nemendur:
• Nemandi í dreifnámi skal fá nákvæma námsáætlun í upphafi annar, þar sem meðal annars er tilgreint hvenær verkefnum skal skilað og hvaða vægi þau hafa.
• Að jafnaði skal við það miðað að kennari og nemandi hafi a.m.k. vikuleg samskipti.
• Sé hluti áfanga verklegur eða námsefni þess eðlis að hrein fjarkennsla henti ekki til að kenna það allt býður skólinn upp á staðbundnar lotur.
• Almennt er miðað við að kennarar svari fyrirspurnum nemenda áður en heill virkur dagur hefur liðið frá því að fyrirspurn berst kennara.

Kröfur sem skólinn gerir til nemenda í dreifnámi:
• Til að ljúka áfanga í dreifnámi þarf nemandi bæði að ná lokaeinkunninni 5 og fá að minnsta kosti 5 á lokaprófi sem gildir a.m.k. 40% til lokaeinkunnar. Ef um er að ræða símatsáfanga skal a.m.k. 40% af námsmati áfangs vera einstaklingsverkefni eða próf sem fara fram í skólanum.
• Nemendum í dreifnámi ber að tengjast námskerfi skólans svo oft sem kennarar þeirra mæla fyrir um og ekki sjaldnar en tvisvar í viku.

Heimilt er að innheimta gjald af nemendum sem stunda dreifnám umfram venjulegt innritunargjald skv. gjaldskrá skólans.

Óski nemandi í dreifnámi eftir því að taka lokapróf annars staðar en í FVA getur viðkomandi sótt um það hjá áfangastjóra a.m.k. tveimur vikum áður en lokapróf hefjast.

Undanfarabrot

Þegar nemandi þarf vegna útskriftar að taka áfanga sem hann hefur ekki lokið undanfara fyrir getur hann sótt um undanþágu. Sótt er um slíka undanþágu á vef skólans.

Árekstrarheimild

Árekstrarheimild er veitt nemanda í reglulegu námi þegar áfangar, sem hann nauðsynlega þarf að stunda á sömu önn, rekast á í töflu og að fyrir árekstri séu gildar ástæður, svo sem að annars tefjist útskrift. Sótt er um árekstrarheimild á vef skólans.

Nemandi verður að ráðgast við kennara viðkomandi áfanga ekki síðar en viku eftir að árekstrarheimildin hefur verið samþykkt, annars fellur hún úr gildi.

Nemandi skal sækja kennslustundir í árekstri samkvæmt samkomulagi við kennara þannig að viðkomandi geti fylgst með og tekið þátt í verkefnum í viðkomandi áföngum. Ef nauðsynlegt er að breyta út af fyrir fram ákveðinni mætingarreglu þarf nemandi að semja um það við viðkomandi kennara.

Undanþágur

Nemendur með þroskahömlun og skyldar raskanir og nemendur með námsörðugleika geta sótt um undanþágu til skólameistara frá einstökum námsáföngum enda sé fullreynt að mati skóla að nemandinn geti náð tökum á námsefninu vegna skilgreindra annmarka. Nemendur skulu þó taka aðra áfanga í stað þeirra sem þeir fá undanþágu frá.

Áður en undanþága er veitt skal skólameistari gera nemendum grein fyrir því að undanþágan gildi aðeins vegna útskriftar af einni tiltekinni braut og geti skert möguleika þeirra til áframhaldandi náms.
Á prófskírteini nemenda skal gera sérstaka grein fyrir undanþágum sem veittar eru.

Til að nemandi teljist hafa reynt að fullu við ákveðinn áfanga er að jafnaði miðað við að viðkomandi hafi setið áfangann a.m.k. þrisvar og að mæting hafi verið viðunandi skv. skólasóknarreglum skólans.

Annað móðurmál en íslenska

Nemendur sem hafa annað móðurmál en íslensku fá kennslu í íslensku sem öðru tungumáli. Nemendur sem hafa dvalið utan Norðurlanda á grunnskólaaldri geta sótt um undanþágu frá Norðurlandamáli.

Endurtaka áfanga

Ef nemandi endurtekur áfanga sem viðkomandi hefur þegar staðist gildir seinni einkunnin.